បុរសម្នាក់ដែលបង្ហោះ រូបភាព បង្អួតកាំភ្លើងច្រង៉េងច្រង៉ាង លើតាប្លូរថយន្ត ត្រូវនគរបាលចាប់ខ្លួន
20-December-2018 | ដោយ ពលមនសិការ
កំពង់ចាម៖ កាលពីថ្ងៃទី១៩ ខែធ្នូ ឆ្នាំ២០១៨ វេលាម៉ោង២២និង៣០នាទីយប់ សមត្ថកិច្ច នៃអធិការដ្ឋានស្រុកព្រៃឈរ បានស្រាវជ្រាវឃាត់ខ្លួនបុរសម្នាក់ អាយុប្រហែល ២៧ឆ្នាំ បានបើករថយន្តម៉ាកឡែនរ៉ូវែ ពណ៌ស ពាក់ស្លាកលេខ ភ្នំពេញ 2AA-3399 បានបង្ហោះរូបភាព បង្អួតកាំភ្លើងច្រងេងច្រងាង លើតាប្លូរថយន្ត។
ឧត្តមសេនីយ៍ទោ ឯម កុសល ស្នងការនគរបាលខេត្ត បានចេញបទបញ្ជា ដល់ជំនាញពាក់ព័ន្ធ ដើម្បីកំណត់អត្តសញ្ញាណបុគ្គលនេះ ព្រមទាំងបញ្ជាអោយអធិការស្រុក-ក្រុងទាំង១០ កំណត់គោលដៅស្វែងរកជាបន្ទាន់ ក្រោយពីទទួលបទបញ្ជារបស់ ឯកឧត្តម អភិបាល នៃគណៈអភិបាលខេត្តកំពង់ចាម អោយតាមឆែកឆេររកអត្តសញ្ញាណរបស់បុរសម្នាក់ ដែលមានគណនេយ្យ ហ្វេសប៊ូកឈ្មោះ (Kongkia VS) ដែលបានបង្ហោះរូបភាព បង្អួតកាំភ្លើងច្រងេងច្រងាង លើតាប្លូរថយន្ត។
ក្រោយពេលទទួលបានបទបញ្ជា កម្លាំងអធិការដ្ឋាន បានបើកកិច្ចប្រតិបត្តិការ ដឹកនាំដោយលោកវរសេនីយ៍ឯក កែវ ស៊ាងហ៊ាន់ អធិការស្រុកព្រៃឈរ បានស្រាវជ្រាវតាមរកមុខសញ្ញាខាងលើ ឃើញនៅមុខវត្តត្រពាំងព្រះ ស្ថិតក្នុងភូមិព្រៃទទឹង ឃុំជ្រៃវៀន ស្រុកព្រៃឈរ ខេត្តកំពង់ចាម ហើយបាននាំឈ្មោះ លី វណ្ណៈ ភេទប្រុស អាយុ២៧ឆ្នាំ មានទីលំនៅនៅភូមិ១ ផ្លូវ១៤៣ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ មុខរបរធ្វើការនៅក្រសួងមហាផ្ទៃ ផ្នែកស៊ីវិល ខាងស៊ើបអង្កេត នាំមកអធិការដ្ឋាន និងត្រួតពិនិត្យឆែកឆេរ លើរថយន្តម៉ាកឡង់រ៉ូវ៉ែ ពណ៌ខ្មៅ ពាក់ស្លាកលេខ 2U-0199 ឃើញមានអាវុធ២ដើម អាកាស្វាយវែង ០១ដើម លេខ ៤៣៦២ បង់មួយគ្រាប់គ្មាន, អាវុធខ្លី ០១ដើម ម៉ាកpak លេខ ០៨១៦.០០១០៤៨ បង់០១ គ្រាប់០៦។ អាវុធនេះជារបស់បងឈ្មោះ ហាក់ ប៉េងឃីម ភេទប្រុស អាយុ៣៤ឆ្នាំ ទីលំនៅភូមិឃុំជាមួយគ្នា មុខរបរនគរបាលក្រសួងមហាផ្ទៃ។
អាវុធទាំងពីរដើម និងរថយន្តមួយគ្រឿងខាងលើ និងជនសង្ស័យនេះ គ្មានអត្តសញ្ញាណសម្គាល់អ្វីទាំងអស់ ជនសង្ស័យ បានធ្វើតេស្តទឹកម៉ូត រកសារធាតុញៀនឃើញថាវិជ្ជមាន ខណៈដែលខ្លួនជិះរថយន្តពីភ្នំពេញមកចូលរួមការនៅភូមិព្រៃទទឹង ថ្ងៃទី២០ ខែធ្នូ ឆ្នាំ២០១៨។
វត្ថុតាងរថយន្ត អាវុធពីរដើមខាងលើ ជំនាញបានដកហូត និងឃាត់ខ្លួនជនសង្ស័យ តាមបញ្ជាលោក ហួត វុទ្ធី ព្រះរាជអាជ្ញា ដោយផ្ទាល់មាត់កសាងសំណុំរឿងតាម តាមនីតិវិធី ៕
ចំនួនអ្នកទស្សនា
- ថ្ងៃនេះ10431
- ម្សិលមិញ11441
- សប្តាហ៍នេះ40261
- ខែនេះ155411
- ឆ្នាំនេះ155411
- សរុប20597867